İşğal oldu Qarabağ

İşğal oldu Qarabağ, çapıb talan etdilər,
Qanla yuyuldu torpaq, hər yeri qan etdilər.

Zülm əlindən camaat elindən gedər oldu,
Yurd köçdü; qaldı ocaq, yerlə-yeksan etdilər.

Müxənnət gülləsinə tuş gəldi neçə insan,
Şəhid oldu uşaqlar, qana qəltan etdilər.

Evdə qaldı kimisi: qoyub qaçmaram- dedi,
Getmedi evdən uzaq, öz canından etdilər.

Güllələndi "Natəvan", "Vaqifin abidəsi",
Dilsiz heykəli, Allah, gülləboran etdilər.

Zamir, əlbət gün gələr, haqq öz yerini tapar,
Çünki o yurdu tapdaq, həm də viran etdilər ...