***Olur

Ağsaqqal bilmə, hər saqqalı ağı,

Saqqala da boya yaxanlar olur.

Aşılmaz bilmə, hər gördüyün dağı,

Ən yüksək dağa da çıxanlar olur.

İmanlı bilmə, hər başı bağlını,

Dəb üçün də çarşaf taxanlar olur.

Öz ağlın bilmə hər kəsin ağlını –

Bir şeyə başqa cür baxanlar olur.

Əzizin bilmə hər üzə güləni,

Bəzən o kəslər ev yıxanlar olur.

Başqaları sənə qurmaz tələni –

Ya doğmalar, ya da yaxınlar olur.

Qəm yaşı bilmə ; hər gözdən axanı,

Bəzən sevincdən də axanlar olur.

İnsan üzməz öz sevdiyi insanı,

Beyninə min fikir soxanlar olur.

“Qırx nökər”dən birinin bəxti çalır.

Bir gün gəlir – yanında xanlar olur.

İnsan ya yüksəlir, ya da alçalır,

Hər addım yoluna çıxanlar olur.

Zamir Erkin Agazade   |   02.08.2009/Şəki