Solum ağrıyır...

 

***
Təkliyi əynimə elə biçmisən, 

çıxarıb bir yana ata bilmirəm. 

Ağlımı başımdan almısan deyə 

başımı heç nəylə qata bilmirəm. 

Əlin əllərimdən süzüldü iptək; 

Başını qoyduğun qolum ağrıyır... 

Qalmışam mən indi bir quru çöptək – 

Sağam, 

Bilmirlər ki, solum ağrıyır... 

İçimi ovutsam, çölüm incidir, 

çölümü unutsam, içim incidir. 

Hər gün evə qaçan, yanına gələn 

ayağım incidir, qıçım incidir. 

Sanki bəxtimizə daş bağlayıblar, 

sonra da atıblar kor bir quyuya... 

Axı hansı dildə yalvarım ki, mən, 

Bir tanrı bəndəsi səsimi duya? 

Zamir Erkin