Bakının günahı

Bakının günahı

Ah, Bakı!..

    Xəritədə əyri oturmusan,

          gəl düz danışaq.

Sıxılıram hərdən səndən:

          havan olur zəhər kimi.

Uzaqlaşmaq istəyirəm;

                    Xəzər kimi –

          dalğa-dalğa,

                   ləpə-ləpə..

Qucaqlaşmaq istəyirəm,

          qorxa-qorxa,

                   öpə-öpə

    neft çəkdiyin yanağını, dodağını..

Amma, yox!..

          Qorxuram ki,

                   dodağıma neft bulaşar,

Sonra sevgilim dalaşar –

sallayar qaş-qabağını.. J

  

Ah, Bakı!..

          Yanağında sızanaqlar çıxır yaman;

                   yekə-yekə,

mərtəbə-mərtəbədir.

Sənə zülüm,

Bizə rahat,

          Bizə lyuks.

Qırışların olur botoks,

hər yanında estetik əməliyyat..

Şəhər üçün bakirəlik əsas deyil:

          Tikdirirlər,

                   sökdürürlər –

                             hər ay, hər il.

Sənə nələr çəkdirirlər..?

Sənin başından olmayan

tükləri əkdirirlər,

    daha min cür zir-zibil..

Ah, Bakı!..

Vah, Bakı!..

Səndə də var günah, Bakı!

Axı:

    Xəritədə əyri oturmusan,

          gəl düz oturub, düz danışaq.. ;)

Zamir Erkin Ağazadə / (03.12.2012 /Bakı)