Payız gəlmədi, ölüm gəldi (ŞEİR)

Yaşadığım müddətdə tanıdığım ən yaxşı insanlardan biri – həkim səriştəsizliyi nəticəsində dünyasını dəyişən Elnarə Tofiqqızının (İmamquliyeva) xatirəsinə ithafən.

22 sentyabr 2013 / 88 saylı marşrutda, işə gedərkən.

Bu fəsil payız gəlmədi –
ölüm gəldi,
ya da ki, ölüm payızdan əvvəl gəldi...

Hə, o, ölümə tələsməzdi,
ölüm tələsdi.
ən çox əzrayılı başa düşmədim;
bu nə qərəzdi??
bəs deyirdilər,
“vaxtsız ölüm gəlməzdi,
filan, zad, şeey..”
ölümü səsləyirəm: “ölüm..! eheeey...!
qapımızı vaxtsız döymə,
heç olmasa körpələri olanlara qıyma,
dəymə...
söymək istəyirəm sənə;
nəyinə söyüm, nəyinə..?”

Bilmirəm...
bilmirəm, bu fəsil niyə belə oldu;
cavan bir ağac qurudu, bir cüt yarpaq soldu...

Yox... Bu fəsil payız gəlmədi –
ölüm gəldi,
ya da ki, ölüm payızdan əvvəl gəldi...