Nəymiş beləcə?

İstəyirəm ki, ilk əvvəl şeirin yazılma tarixçəsini yazım.. Şeir 2005-ci il iyulun 24-də (14 yaşımda ikən) yazılıb..

İstirahət üçün 20 günlük  İsmayıllı rayonunun Lahıc kəndinə getmişdik. Qalmaq üçün tutduğumuz evin qonşuluğunda isə şairə bir qadın - Gülxar Cəbiqızı yaşayırmış, sən demə.. Bu qadın məni kənardan izləyir, hərəkətlərimə diqqət yetirirmiş.. Belə ki, bir gün mənə 3 bənd şeir yazıb göndərdi..  Mən isə o vaxta qədər elə-belə cızma-qara yazdığım yazılar olurdu, amma mütləq şeir yazmalıyam deyib oturub nəsə yazmamışdım.. Amma həmin gün oturub həmin şeirə 3 bənd cavab yazdım.. Artıq 6 ildən çox vaxt keçir o xoş təsadüfdən.. İndi isə o şeiri sizinlə paylaşıram..

~~

G.Cəbiqızı:

Gəzirsən xəyallı, dərin duyğulu.

Sanki fikirlərin yorğun, yuxulu,

Elə davranırsan; möhtərəm, ulu,

Səni düşündürən nəymiş beləcə?..

~~

Z.E.Ağazadə:

Xəyala dalanın duyğusu dərin,

Fikirsiz insanlar tapılar çətin,

Çox da yüngül olsan, olmaz hörmətin,

Elə deyildirmi, deyirəm sizcə?

Sizi düşündürən, budurmu bircə?

~~

 G.Cəbiqızı:

Bu yaşda həsrətmi haqlayıb səni?..

Qəlbini intizar talayıb sənin,

İçində qəm odu qalanıb sənin,

Səni düşündürən nəymiş beləcə?..

~~

Z.E.Ağazadə:

Çox həsrət çəkmişəm, göz yolda qalıb,

Yaşamaq həvəsim, gücüm azalıb,

Bu ürək hər dərdi içinə salıb,

Çəkir aram-aram, çəkir gizlicə,

Sizi düşündürən, budurmu bircə?

~~

 G.Cəbiqızı:

Qızdır günəş təki körpə könlünü,

Bitir eşq bağında sevda gülünü,

Hissinin sevincə döndər yolunu,

Dəysin ağrıların daşa, balaca..

Səni düşündürən nəymiş beləcə?..

~~

Z.E.Ağazadə:

İnşallah, bu könlüm oyanar bir gün,

Oyanar həm eşqim, həm ruhum bütün.

Heç kəs poza bilməz ilahi hökmün,

Olub və olacaq yəqin beləcə,

Sizi düşündürən, budurmu bircə?