Kor, peşman

Zamir Erkin

Bəlkə də dedin ki, gəlmədi – getdi,

Özüm də özümə gələ bilmədim.

Üzüldüm, üzümdən gülüşlər itdi,

Mən sənin qədrini bilə bilmədim..

Sayyara Nabi

Sənə ürək verdim, saf və pakizə.

Başqa birisiylə bölə bilmədim.

Bu sevgi yetərdi, lap ikimizə!

Sən mənim qədrimi bilə bilmədin..

Zamir Erkin

Görmədim mən səni, gözüm kor imiş,

Axan göz yaşların seldən gur imiş.

Ölmüşəm, sənsizlik mənə gor imiş

Mən sənin qədrini bilə bilmədim..

Sayyara Nabi

Səni həyat bildim, daxma imişsən,

Mənə yad, əğyara doğma imişsən,

Gülünü sevməyən bağban imişsən,

Sən mənim qədrimi bilə bilmədin..

Zamir Erkin

Qürurum alçaldı önündə sənin.

Yoxmu "bağışlamaq" dinində sənin?

Mələk günah yazmaz -çiynində sənin,

Mən sənin qədrini bilə bilmədim.

Sayyara Nabi

Səni görən zaman durdu ürəyim

Çox gözəl xəyallar qurdum, Ürəyim.

Özüm öz qəlbimi qırdım, neyləyim

Sən mənim qədrimi bilə bilmədin.

Zamir Erkin

Sən ayrılsan, mən ayrılmam deyirdim,

Səndən ayrı 1 gün olmam deyirdim,

Dərdindən ölərəm, qalmam deyirdim,

Çox ölmək istədim, ölə bilmədim,

Mən sənin qədrini bilə bilmədim..

Sayyara Nabi

Bəlkə mən başqayam, sən də bir başqa.

Necə qıya bildin, bu gözəl eşqə?!

Artıq söz söyləmə, yaramı deşmə,

Sən mənim qədrimi bilə bilmədin.